Lífið

... fátt er hollara ungum drengjum, fyrir utan það að missa móður sína, að missa föður sinn...

Eitthvað á þessa leið hefst Brekkukotsannáll...

Ég skrifaði fyrir margt löngu ritgerð um þessa bók... hef reyndar ekki lesið hana síðan, en þessi setning (fletti ekki upp á því hvort hún er rétt, bara eins og ég man hana) hefur aftur og aftur komið upp í hugann á mér í gegnum tíðina...

.

 

 

.

Einhvern tíman var ég sammála þessu... börn hefðu bara gott af því að bjarga sér upp á eigin spýtur... og kæmust betur af í lífinu... en ég er það ekki lengur... held að ást, umhyggja, stuðningur fleyti börnum lengra...  en auðvitað verða ungar manneskjur að læra að standa á eigin fótum og læra að bjarga sér... en það er hægt að leiðbeina og kenna til að forðast að unga fólkið geri mistök... og hvað er yndislegra en að sjá ungt fólki á beinu brautinni í lífinu... áhugasamt um verkefni sín og geislandi af krafti...

Hef ekki hugmynd um af hverju mér datt þetta í hug núna í morgunsárið...

... skiptir ekki máli...

Þessi dagur er fallegur... ég ætla að njóta hans.

 

Guð og karlarnir

Ég heyrði sögu um tvo karla
ég kannaðist við þá en þekkti varla

Þeir voru að tala um góða veðrið
og studdu sig við rústrautt handrið

þá allt í einu fór að rigna
og birkitréin fóru að svigna

karlarnir hlupu á bak við hól
og reyndu að finna eitthvert skjól

Að stríða körlum er sko ekki bannað
Hugsaði Guð og glotti út í annað
 

.

.

 

Suðupotturinn, seinni hluti

... fyrir þá sem misstu af fyrrihluta leikritsins Suðupotturinn, þá er hann HÉR.

Í lok fyrri þáttar rauk Bjargey Björt inn í stofu til að skamma Geirsvan.

Bjargey Björt kallar : Geirsvanur!!!

Geirsvanur stekkur upp úr sófanum og hrópar á móti: Já, hvað er að?

Bjargey Björt : Hvað er að... þú ættir nú sjálfur að segja mér hvað er að.

Geirsvanur : Mér brá bara, það er ekkert að.

Bjargey Björt : OK skan... ég ætlaði ekki að bregða þér; hvað ertu annars að sjóða í pottinum?

Geirsvanur : Ég veiddi nokkra hettumáva í dag... ég ætlaði að koma þér á óvart og hafa hettumávasúpu í kvöld...

.

 

.

Bjargey Björt : Ó, en þú æði... keyptir þú nokkuð hvítvín líka?

Geirsvanur : Já, uppáhaldið þitt, bjartasta vonin mín.

Bjargey Björt : En börnin, hvar eru þau?

Geirsvanur : Ég bað mömmu að passa þau í kvöld, ég tók nefnilega mynd á leigunni líka.

Bjargey Björt : Þú ert algjör klessa, elsku Geirsvanur.

Og svo kyssti hún hann rembingskossi á ennið.

Bjargey Björt og Geirsvanur borðuðu hettumávasúpu og drukku Tittarelli hvítvín með.

Tvö fjólublá kerti loguðu á milli þeirra.

.

 

.

Kraftaverk

... ég er búinn að vera með ofboðslega mikinn kraftaverk í upphandleggsvöðvunum upp á síðkastið...

... ég er búinn að vera að lyfta nýúthlutuðum lóðum... 

Ef þið sjáið pervisinn mann á gangi, þá hefur hann ekki fengið lóð.

 

.

 

.

Tilkall

Það eru til margar gerðir af körlum (köllum)

Trillukall
Prestakall
Pezkall
Spýtukall
Bræðurnir Tíkall og Túkall
Þú sund kall
Sápugerðakall
Heilaskurðlækningakall
Tilkall

Vinur minn er mjög loðinn á bringunni... hann segir gjarnan... "við þessir loðnu sjómenn"...

Samt er hann ekki loðnukall. Ó, hvað lífið getur verið flókið á stundum.

.

 

.

 

Sagan af Vantvið bónda

... einu sinni var kotbóndi sem hét Vantvið... hann átti heima á bæ sem hét Síða... alltaf var mikið rusl og skítur í kringum bæinn og útihúsin... bændurnir í sveitinni kölluðu bæinn aldrei annað en ForSíðu...

Vantvið bóndi var eitt sinn að ná í naut upp í hólf... nautinu skyldi slátra þá um kvöldið... vildi þá ekki betur til en að nautið stangaði kallinn í hausinn svo karlskarfurinn steinrotaðist...

.

 

.

Kerlingin hans, hún Vantfríður kemur að honum stuttu síðar og bregður illilega, því hún heldur að Vantvið sé dauður... hann lá við skurðbakka, með gapandi munn og steingrá augun horfðu til himins... það vildi svo heppilega til að hún var með gemsann sinn á sér og hringdi strax í dýralækninn...

Vantausti, (en svo hét dýralæknirinn) Vantrausti... æpti kerlingin í gemsann... ég held að hann Vantvið sé dauður...

Hvað segirðu Vantfríður mín, er hann Vantvið dáinn? Já, kjökraði kerlinginn; hann hreyfir hvorki legg né lið og horfir upp í himininn... það er eins og hann sjái Guð sjálfan... það er eins og hann brosi...

OK sagði Vantrausti dýralæknir þá; náðu í fötu af vatni og skvettu framan í karlgarminn og sjáðu hvað gerist...

.

 

.

En við sem bíðum spennt eftir sögulokum fáum aldrei að vita hvað gerðist, því hann Vantrausti dýralæknir sagði mér þessa sögu... eftir að hann bað Vantfríði að sækja vatnið, þá heyrði hann aldrei í henni framar...

Eina sem hann heyrði í gemsanum eftir það var...

...númerið sem þú hringdir í er utan þjónustusvæðis...eða allar rásir uppteknar...

Við verðum bara að horfa út um gluggann í kvöld og spyrja stilltan vorhimininn;

Er hann Vantvið látinn?

Allt í móðu

Ég velti stundum vöngum á sunnudögum. Byrja um leið og ég vakna og velti vöngunum um allt hús.
Vangarnir hafa mjög gott af því... verða rjóðir og útiteknir, þrátt fyrir að fara ekki út úr húsi. Svo verða gólfin svo skínandi hrein og gljáandi á eftir. Endilega prufið að velta vöngum.

En heilinn er ekki vaknaður ennþá og minnið sefur vært við hlið hans.

Ég læt því nægja að birta hér vísu eftir M.Hannesson, sem útskýrir
ástandið á mér.

Með stírur í augum ég sit
sötra morgunteið mitt góða
hvar er nú mitt mikla vit?
milli eyrnanna bara móða.

.

.

Stundum þarf maður að hoppa upp úr hulstrinu og horfa á heiminn með öðrum augum.

 

Með hverju skoraði Ronaldo?

Manchester United vann frækinn sigur á West Ham í dag, 4-1. Ronaldo skoraði 2 mörk, annað glæsilegt en hitt sérlega frumlegt. 

... Ronaldo er fjölhæfur... hælspyrnur, skallamörk, mörk af löngu færi, mörk af stuttu færi... en skoraði hann ekki seinna markið sitt í dag frá miðjunni... hmm... ekki miðjunni á vellinum, heldur annarri miðju... hmm... ja, þið skiljið hvað ég er að fara...

... markið var náttúrulega löglegt, þrátt fyrir það en vita siðlaust...

.

.

Nú verður það létt!

... nei, nú held ég að Man. United taki West Ham örugglega... spái 4-0 í dag... það kemur að því að svona grýla verði kveðin niður... en það má þó búast við skjálfta í mönnun svona fyrstu 2 mínúturnar eða svo... en Ferguson hefur oft verið í nákvæmlega svona stöðu og veit hvað til þarf til að berja menn áfram... held að United byrji með stórsókn og að fyrsta markið verði skorað á 9 mínútu... þá verður pressan farin og menn spila af hjartans lyst og með mikilli leikgleði...

.

 

.

Tekst West Ham að leggja United í fjórða leiknum í röð?

Veikindi leikara

... ég veit að alþjóð bíður eftir framhaldi leikritsins "Suðupotturinn", ég verð því miður að tilkynna að það eru veikindi í röðum leikara og ekki hægt að sýna framhaldið fyrr en flensan er á bak og burt...

Ég get þó sagt ykkur í óspurðum fréttum að ég er að fara til útlanda eftir rúma viku. Fór og fékk sprautu við barnaveiki í gær... er búinn að vera svolítið skrítinn síðan... svo var önnur sprauta við mænuveiki... nú mæni ég bara út í loftið... og tala barnamál...

... en verð nú að drífa mig í matinn... það er Gerber í kvöldmatinn...

.

 

.