Tærnar og hælarnir

Gott kvöld,

Nú hefst þátturinn "Býr bavíani hér"... þáttur í anda Sherlock Holmes þar sem stækkunarglerinu er beint að orðum og orðtökum.

Tölum örlítið um orð sem tengjast búknum okkar;

Oft er talað um að hæla einhverjum? Ég verð nú að hæla þér fyrir dugnaðinn Dengsi minn.

Svo er talað um að vera á hælunum og þá er ekki hægt að hæla manni vegna þess að þá er maður með allt niður um sig.

Þá er talað um að vera á tánum... mér finnst ég alltaf vera á tánum en á sama tíma er ég á hælunum líka.

Svo er maður á herðablöðunum þegar maður hefur fengið sér einum og mikið í tána. Undir slíkum kringumstæðum hafa Íslendingar oft gefið hvor öðrum kinnhest eða jafnvel einn á kjammann.

En svo hefur vafist fyrir mér orðið bumbult, átta mig ekki alveg á því hvort og þá hvernig það tengist líkama okkar.

En kannist þið við skylt orð, bumbuull... ?

Jú, bumbuull er þessi illræmda naflaló sem var í fréttunum fyrir stuttu.

Þættinum er lokið.

Brattur, alltaf með tærnar rétt hjá hælunum.
.

 

.

 

Athugasemdir

[Einar Indriðason, 3.3.2009 kl. 07:41]

Íslenskt mál:  "Þættinum hefur borist bréf" :-)

Alltaf gaman að svona pælingum :-)

[Guðný Anna Arnþórsdóttir, 3.3.2009 kl. 21:42]

Þetta er alveg bráðskemmtilegt. Etu búin að leita orðskýringa í nýju orðabókinni á netinu?

Góðar kveðjur til þín, Brattur min, - (er sjaldan inni núorðið....og þess vegna svona ógnarlega hátíðleg).

[Ingibjörg Friðriksdóttir, 3.3.2009 kl. 22:10]

Það er orðið framorðið, Ingibjörg.  sagði Árni Böðvars hérna um árið. 

Mig langar að biðja þáttinn um að útskýra orðasambandið að „mæla gólflistana“

[Brattur, 4.3.2009 kl. 08:04]

Ný orðabók á netinu? Ekki hef ég séð hana... nota bara orðabókina í toppstykkinu...

Að mæla gólflistana verður tekið fyrir mjög fljótlega, eða við annan ostbita eins og maðurinn sagði...

[Halldór Egill Guðnason, 4.3.2009 kl. 08:41]

Orðið "bumb-ult" er yfirleitt notað um bumbuull (naflaló) sem dettur-veltur sjálf úr naflanum og þá sem hespa eða hnykill, til rýma fyrir nýrri. Kona að austan benti Tuðaranum á að ef manni væri orðið "bumbult", væri kominn tími til að fara í bað og skola úr naflanum. Meðalnafli tekur ekki nema fjögurra til fimm daga "hnykil" (er y eða einfalt i í þessu orði, ha? )og því ljóst að talsvert er til í þessari ábendingu að austan. Annars er orðabókin í toppstykkinu á þér, Brattur minn, alveg nóg hverjum manni og konu. Þú verður bara að gæta að því að hafa hana ávallt opna og aðgengilega fyrir okkur hin.

[Ingibjörg Friðriksdóttir, 4.3.2009 kl. 14:19]

Ég brenn í skinninu, enda að kenna ungum börnum sem gott hafa af því að auðga málskilning sinn.

ég var einu sinni vel slompuð í Njálsbúð og það gekk alveg fjöllunum hærra, að ég hefði enn einu sinni farið yfir strikið og mælt gólflistana þarna niður í Vestur Landeyjum.  Alltaf langað að vita samhengið í því.

[Brattur, 4.3.2009 kl. 18:40]

Halldór... ótrúlegt hvað þessi kona að austan býr yfir mikilli þekkingu, man varla eftir þætti um íslenskt mál í útvarpinu í gamla daga þar sem hún kom ekki við sögu...

Ingibjörg ... gott að fá meiri upplýsingar um "að mæla gólflistana" áður en það verður tekið fyrir í þættinum.