Að sofa vært við ána

Smá viðbót við veiðipistilinn hér að neðan. 
Á einni vaktinni vorum við 3 félagarnir á lélegasta veiðistaðnum í ánni.
Ég varð leiður á að standa út í á og kasta flugunni útí vonleysið.
Fór í land og lagði mig á bakkann. Í mjúkri sinunni og við mjúkan árniðinn sveif ég fljótlega inn í draumaheima. Og mig dreymdi að ég væri að veiða!

Í draumnum kastaði ég púpunni uppí strauminn og fylgdist grant með tökuvaranum; og viti menn hann fór í kaf og ég brást snöggt við og kippi stönginni upp. Ég vaknaði við þessi læti og hafði þá rifið upp gamlan hvannarstöngul sem var við hliðina á mér, með látum og hélt á honum í hendinni eins og veiðistöng! Ég hló smástund að sjálum mér og lagðist út af aftur og vaknaði ekki fyrr en félagi minn kom upp úr ánni og sprakaði í síðuna á mér og kallaði ræs gamla drusla! Mikið skrambi var þetta annars góð kría.

 

 

Athugasemdir

[Heiða B. Heiðars, 11.6.2007 kl. 01:48]

Hann er kaldur þessi félagi þinn... sparka svona í vopnaðan mann!

[Anna Einarsdóttir, 11.6.2007 kl. 21:24]

 Veiddirðu nokkuð á Hvannarstöngulinn ?  Eitt síli kannski.

[Brattur, 11.6.2007 kl. 22:06]

Heyrðu Anna, ég fékk flugfisk, en sleppti honum aftur... þeir eru svo sjaldgæfir blessaðir í íslenskum ám... en kannski dreymdi mig það líka... kannski er ég bara enn sofandi á árbakkanum; veit ekkert í minn haus lengur

[Anna Einarsdóttir, 11.6.2007 kl. 22:21]

VEISTU HVAÐ STÖNGIN KOSTAR ?  VAKNAÐU MAÐUR !!

[Brattur, 11.6.2007 kl. 22:37]

Stöngin kostar helvíti mikið, það veit ég... en ég næ bara ekki að vakna, þetta er svo skemmtilegur draumur... en nú er einhver kona farin að sparka í mig, það er svona gott/vont