Hvað eruð þið að pæla?

Það er svo margt sem maður hugsar ekkert út í... nú, kunnið þið að spyrja... eins og hvað?

Hafið þið t.d. hugsað út í það hver það var sem fann upp rörtöngina?

Vissi það, þið hafið bara aldrei pælt í því.

Hafið þið einhvern tímann hugsað út í það hvernig blýið er sett inn í blýantana?

Vissi það, þið eruð aldrei að pæla í blýöntum... haldið þið kannski að þeir fæðist bara svona? 

Af hverju hefur drullupollum fækkað á Íslandi svo þeir eru nánast í útrýmingarhættu?

Vissi það, þið eruð bara ekkert að pæla í drullupollum.

Þá spyr ég; hvað eruð þið eiginlega að pæla???
.

 

.

 

Athugasemdir

[Svanur Gísli Þorkelsson, 21.3.2009 kl. 11:05]

Þetta með rörtöngina er dálítið snúð. Daniel C. Stillson fék einleyfi á svokallaðri Stillson töng árið 1870 í Bretlandi. Ákveðnar heimildir segja að hinn bandaríski Charles Moncku hafi fundið upp "monkey töngina 1858 og nafnið á henni Monkey Wrench sé afbökun á nafni hans. Samt eru heimildir til um Monkey wrench til frá því fyrir árið 1840. Annars er saga tanga merkileg fræði. Þess má geta að ég keypti mér mína fyrstu rörtöng fyrir tveimur dögum :)

Blýantaleyndarmálinu var eiginlega þröngvað upp á okkur nemendur á Núpi árið 1969 þegar að allir blýantarnir úr sendingu sem bókasala skólans fékk fóru að detta í sundur (klofna til helminga eftir endilöngu) mest held ég af því að límingin stóðst ekki álag tanna nemaendanna. En það var ekki hægt að sakast við ítölsku hjónin  Simonio og Lindiana Bernacotti sem fundu upp þess ágætu aðferð, að koma blýinu fyrir í tréhylki sem búið var til úr tveimur samanlímdum helmingum.

Fyrir fáeinum vikum bloggaði ég um drullupolla í Keflavík og hvernig þeir hafa gersamlega horfið af götum og svæðum bæjarins. Ætla má að svipaðar ástæður liggi fyrir hvarfi þeirra annarsstaðar á landinu. Betri undirvinna við gatnagerð og meiri undirbúningur við athafnasvæði nýbygginga.

Annars þakka ég fyrir skemmtilega og öðruvísi pistla Brattur en gengur og gerist. Orðaleikir, ljóð og sögur eru góð tilbreyting frá argaþrasinu.

kv,

[Brattur, 21.3.2009 kl. 11:46]

Vissi svosem að það væri einhver að pæla í rörtöngum, blýöntum og drullupollum. Það kemur ekkert á óvart að það skulir vera þú Svanur Gísli

Takk fyrir góð orð... en smá forvitni... til hvers þurftir þú að kaupa rörtöngina?

[Ragnheiður , 21.3.2009 kl. 12:58]

Sko ég get kinnroðalaust játað að ég hef ekki pælt í rörtöngum, einu afskipti mín af drullupollum voru að stökkva, leggjast eða nota þá í drullumall. Mamma bannaði mér að bleyta fötin og ég snaraði mér þá bara úr þeim, í pollinn ætlaði ég.

En mér er minnisstætt að hafa spáð helling í það hvernig blýið komst í blýantinn. Leitaði að samskeytum og ég veit ekki hvað. Taldi mig svo hafa fundið lausnina þegar ég komst að því að blý getur verið fljótandi.

Knúsaðu Önnu, stórt afmælisknús frá mér og þetta er bara þriðja kveðjan sem ég kem á hana í dag. Aldrei of margar kveðjur til yndislegrar vinkonu

[Svanur Gísli Þorkelsson, 21.3.2009 kl. 13:16]

Ég þurfti að skipta um blöndunartæki á baðinu Brattur.

Þetta væri alveg rökrétt hjá Ragnheiði Himmamömmu ef enn væri notaður blýmálmur í blýanta.

Nú til dags eru blýantar framleiddir með því að blanda saman fínum grafít og leirdufti, svo er blandað vatni og langir spagettí-legum strengum og síðan eru þeir hitaðir í sérstökum ofni. Síðan eru strengunum dýft í olíu eða bráðið vax sem rennur inní smálar holur á efninu, sem leiðir til auðveldari og mýkrar skriftar.    Eða svo segir hin alvitra véfrétt wikipedia.

[Brattur, 21.3.2009 kl. 15:57]

Ég "rörtangaði" ýmislegt á heimilinu í fyrra... en nú er eitthvað farið að losna... nú verð ég líklega að skríða undir vask með rörtöng og herða... en ég verð að herða mig fyrst upp í að hefja verkið...

[Svanur Gísli Þorkelsson, 21.3.2009 kl. 16:06]

Og ég sem héllt að þú værir svo harður nagli. En það er víst annað verkfæri ..úbbs.

[Guðný Anna Arnþórsdóttir, 21.3.2009 kl. 16:36]

Dæs, stuna, púl og pæl.

[Brjánn Guðjónsson, 21.3.2009 kl. 18:29]

ég hef það eftir áreiðanlegum heimildum að píparinn Borat, hinn borubratti, hafi hannað rörtöngina.

blýantar eru í raun rangnefni. kannski var í þeim blý í upphafi en í dag innihalda þeir kolefni en ekki blý.

hvað drullupollana varðar, er það mikið áhyggjuefni. mesta áfallið skall á fyrir fjörutíu árum eða svo, þegar bæjarstjórn Kópavogsbæjar var kynnt undur malbiksins.