Að vera ríkur

... peningar eru ekki allt... en það er samt vont að vera án þeirra... ég vildi heldur gráta í nýjum Mercedes Benz heldur en gömlu Skóda... sagði góð kona einu sinni... það má kannski alveg skrifa undir það... en þegar mest á reynir þá gera peningar ekkert gagn... maður kaupir ekki hamingjuna né heilsuna fyrir peninga... ung fréttakona sagði einu sinni við Alla ríka á Eskifirði... Aðalsteinn, ertu ekki ríkur? Alli var farinn að eldast og svaraði ungu fréttakonunni; nei... ég er ekki ríkur, það ert þú sem ert rík, þú ert ung og þú átt allt lífið framundan... hann vissi, sá gamli að unga konan var rík... hann átti bara peninga...

 

Bóndinn.

Hann stakk
höndum sínum
í nýplægða jörðina
lyfti fullum
lófum
til himins
lét jarðveginn
renna milli
fingra sér
 

hugsaði glaður
í bragði;

ég er moldríkur!

Athugasemdir

[Anna Einarsdóttir, 26.9.2007 kl. 21:44]

Góður pistill ...... og ef einhvern vantar mold, þá get ég gefið hana í hjólböruvís.... og allir verða moldríkir. 

[Marta B Helgadóttir, 26.9.2007 kl. 21:44]

... það er margt fallegt í hausnum á þér Brattur ...ríkur haus

[Ingibjörg Friðriksdóttir, 26.9.2007 kl. 22:15]

Jebb, við erum sólarmegin í lífinu.

Góða nótt Brattur og takk fyrir að minna okkur á. 

[Hulda Margrét Traustadóttir, 27.9.2007 kl. 08:34]

Góð hugsun og gott ljóð.....Ég átti einu sinni Skoda og finnst hálfgerð forréttinidi að hafa reynt það, hann var gamall greyið og einu sinni var ég að keyra niður í Fljótin af Lágheiðinni og þá allt í einu fossaði vatn inn í bílinn fyrir neðan mælaborðið... ég stoppaði rennslið með einhverri flík og komst á leiðarenda.....hann dugði á meðan hann dugði - eða þannig MT

[Halldór Egill Guðnason, 27.9.2007 kl. 09:18]

Góður Brattur, að vanda. Alveg satt að peningar séu ekki allt, en þeir eru samt einhvern veginn svona töluvert svakalega oggulítið ágætir, ef maður á eitthvað af þeim, eða þannig. Anna.: er á leiðinni og ætla að fá í 4 hjólbörur.

[Arnfinnur Bragason, 27.9.2007 kl. 11:36]

Þegar maður á ekki peninga þá er samt helv... gott að telja þá uppsprettu hamingjunnar

[Anna Einarsdóttir, 27.9.2007 kl. 12:09]

Halldór.... moldin bíður og kaffið líka.  Viltu fá mold með skít ?  Þá áttu skítnóg og ert moldríkur. 

[Ari Guðmar Hallgrímsson, 27.9.2007 kl. 14:54]

Ljóðið frábært sennilega fækkar þeim mönnum óðfluga sem hugsa svona

[Vilborg Traustadóttir, 27.9.2007 kl. 15:57]

Skodinn stendur fyrir sínu,  ætlaði einu sinni að kaupa einn og fékk að prufukeyra hann, þegar hann dreif ekki upp gömlu Mánárskriðurnar nema afturábak hætti ég við kaupin, keypti Wartburg í staðinn og hann var eðal bíll.....þegar hann fór í gang.  Góð pæling hjá þér.....

[Jóna Á. Gísladóttir, 27.9.2007 kl. 16:49]

Ég tek undir orð konunnar; vildi frekar gráta í Benz en Skoda. Money makes the world go round.... því miður.

Ef ég ætti skítnóg af peningum þá myndi ég hætta að vinna og fara að gera eitthvað sem mig langar til. það er ekki hægt að mótmæla því að peningar auðvelda manni lífið þó þeir færi manni ekki hamingju.

[Edda Agnarsdóttir, 27.9.2007 kl. 22:01]

O hvað ég er fegin að vera UNG!

[Guðný Anna Arnþórsdóttir, 27.9.2007 kl. 23:01]

Góðar hugsanir og gildar, Brattur kær.  Frábært ljóð líka.  (Ég er alltaf að skjalla þig, held að þú farin að kalla mig Sjallnýju Könnu).

[Guðný Anna Arnþórsdóttir, 27.9.2007 kl. 23:01]

Meina Skjallnýju....

[Halldór Egill Guðnason, 28.9.2007 kl. 11:17]

Ég hef einu sinni grátið í bíl. Það var í austin Mini, en þá var líka búið að keyra hann í klessu. Hefði frekar viljað gráta í Benz, því hann hefði sennilega ekki beyglast svona helvíti mikið. Gott ef maður hefði þá bara ekki rétt kjökrað.

[Ingibjörg Friðriksdóttir, 28.9.2007 kl. 16:40]

Ég á skítnóg af peningum og er moldrík.  Takk Anna. þú auðgar, kætir og bætir málskilning minn.