Stuttur draumur

... mig dreymdi skrítinn draum og stuttan fyrir nokkru ...

... ég var í vinnunni þegar að mér gengur miðaldra kona í pels, sauðdrukkin... hún segir;

Heitir þú ekki Guðmundur? Og bætir við; var pabbi þinn ekki eldri en þú?

Ég hló góðlátlega og sagði; eru feður ekki yfirleitt eldri?

Lengri var nú draumurinn ekki.

Hvað segi þið... hvað þýðir þessi draumur?
.

.

Laufabrauðssagan 2.hluti

 Þegar brauðið kláraðist kallaði Ólafur hátt og hvellt svo heyrðist til næstu húsa „Laufa... brauð... meira brauð“ og aftur „Laufa, brauð, komdu með brauð vinan mín“. Urðu konur í næstu húsum mjög forvitnar og langaði að vita hvernig það brauð væri sem Ólafur kallaði svo hátt á og fóru heim til þeirra hjóna og sögðu: „Af hverju kallar hann Óli alltaf  Laufa-brauð, Laufa-brauð“?  Var þeim sögð sagan og báðu þær Laufu þegar um uppskriftina og var það auðsótt mál, ef þær lofuðu því að enginn utan fjarðarins fengju nokkurn tíma að sjá hana. Þær lofuðu því og nefndu brauðið Laufabrauð“ eftir kalli Ólafs.  
. 

.
Seinna þegar Ísland var albyggt kvisaðist það út að á Ólafsfirði væri til sérstök tegund brauðs er borðað væri á jólum eingöngu og þætti gott. Þingeyingar vildu gjarnan komast yfir uppskriftina og eigna sér hana, enda manna ánægðastir með lífið og þykjast gjarnan upphafsmenn alls.
Til dæmis má nefna að þegar Kaupfélag Þingeyinga var stofnað, fyrst allra kaupfélaga á Íslandi að þeirra mati, var kaupfélag Ólafsfirðinga löngu komið á hausinn.  
 Þingeyingar gerðu út leiðangur til Ólafsfjarðar og stálu uppskriftinni af gamalli ekkju – lasburða. En þegar þeir rifu blaðið úr uppskriftabókinni hennar varð eftir setning neðst þar sem stóð „kúmen eftir smekk“. Þess vegna sjá menn og vita að upprunalegt Laufabrauð er með kúmeni en önnur ekki. Þingeyskt Laufabrauð er því bara plat. (Varist eftirlíkingar)
.

 

.

Ef þú vilt fá ekta Laufabrauð verður þú að snúa þér til einhvers góðs Ólafsfirðings sem gerir brauðið eftir uppskriftinni hennar Laufu gömlu.
Til gamans má geta að bróðir Laufu var Skarphéðinn Skata – hann fann upp skötuna. Þá var Patrekur pipar einnig bróðir þeirra, en sá fann upp piparkökuna. Þeirra saga verður sögð síðar.  Ýmsa aðra siði sérstaka höfðu Ólafsfirðingar á jólum. Skal hér eitt dæmi tekið til gamans í lokin.

Til að skemmta börnum sínum um jólin var sú nýbreytni tekin upp er fólk af öpum komið fór að setjast að í nálægum byggðum að farinn var leiðangur til bæjar eins skammt frá er Akureyri hét. Þar voru fengnir nokkrir sveinar, oftast þrettán, að láni til að skemmta krökkum Ólafsfirðinga.  Fólk það er á Akureyri bjó þótti mjög skrýtið og sérkennilegt og ekki þótti það beint stíga í vitið og því tilvalið skemmtiefni.  
.

.
Eftir ein jólin voru sveinar þessir sendir í fyrsta skiptið einir heim, gangandi yfir Tröllaskagafjöllin. Sem vita mátti rötuðu þeir ekki heim, villtust á fjöllum og eru þar enn.
Þeir koma þó til byggða einu sinni á ári um þetta leiti árs og litlu börnin kalla þá jólasveina.  

.Ég kalla þá nú bara Akureyringa.

Laufabrauðssagan

Nú er komið að endurflutningi.  Birti þessa sögu á svipuðum tíma í fyrra. Þessi saga "þroskast" og tekur breytingum milli ára. Birti hana í tveim hlutum. Hér kemur fyrri hlutinn.

Sagan um uppruna Laufabrauðsins.

Nokkru áður en Ingólfur strokumaður frá Noregi fann Ísland, hafði sest að fólk og hafið búsetu í miðju steinhjarta Tröllaskagans. Engin vissi hvaðan þetta fólk hafði komið. Talið er þó, vegna hárrar greindarvísitölu og mikillar útgeislunnar stofnsins að það hafi ekki verið komið af öpum eins og aðrir sem jörð þessa byggja. Tilgátur eru á lofti um að það hafi verið  komið langt að, jafnvel frá fjarlægum sólkerfum.  Fólk þetta settist  að í frjóum og afskekktum firði með háum fjöllum allt í kring. Fjörðinn  nefndu þau Ólafsfjörð eftir foringja sínum, Ólafi Bekk.

Ólafur Bekkur  átti konu eina, mikinn skörung og skemmtilega. Hún kunni líka ýmislegt fyrir sér í eldhúsinu blessunin. Kvennmaður þessi hét Laufa og bar eftirnafn manns sín. Laufa Bekkur hét hún því fullu nafni. Hún var ætíð góð við kallinn sinn og hugsaði um hann af einstakri natni og ást. Ólafur Bekkur sást því aldrei öðruvísi en brosandi út að eyrum. 
Seinna umbraust, sem kallað er,  F-ið í nafninu Laufa í G og þaðan er nútímanafnið Lauga komið. Þetta merka brauð sem hér er um fjallað,  ætti því að heita Laugabrauð, en ekki Laufabrauð. 
.

 

.
Laufa var góður kokkur, eldaði og bakaði ýmislegt er þeir sem síðar komu til landsins höfðu aldrei séð hvað þá smakkað og var margt af því tengt jólahátíðinni. Enginn vissi reyndar í þá daga af hverju þeir voru að halda jólin hátíðleg. Heimsumbólið var aldrei sungið af því að það var ekki enn búið að semja það. En þó voru til jólalög og þeirra vinsælast var Þrumarasöngurinn.

Þruma - þruma - þruma
við skulum klóra suma
undri herðablaðið
eftir jólabaðið.

Brauð var steikt um jól og borðað með jólamatnum ásamt öli sem karlmennirnir brugguðu. Sagt er að þegar Ólafur hafi verið orðinn hýr og kátur eftir stífa drykkju, hafi hann étið manna mest af kjöti með Þora baunum og niðurstúf... niðurstúfur var svört sósa ekki ósvipuð þeirri hvítu sósu sem við í dag köllum uppstúf... niðurstúfurinn var bara miklu sætari. Þora baunirnar eru náttúrulega bara grænu baunirnar sem við köllum núna Ora baunir. En í þá daga voru það bara hinir hugrökkustu sem þorðu að borða þessar grænu baunir, Þora baunirnar.  Liturinn á þeim skelfdi. 

Hefð var fyrir því að borða hanginn skarfa á Aðfangadag. Með skarfinum voru snæddar barða kartöflur (það var áður en fólk fór að stappa kartöflur) með njólauppstúf. 
Ef að skarfurinn var vel hanginn, ljúffengur og bragðsterkur sögðu menn; þetta er nú meiri skarfurinn.
Best þótti þó Óla kallinum þunna brauðið er elskulega Laufa hans hafði steikt uppúr feiti og kláraðist það ætíð fyrst allra kræsinga af borðum.

Það eina sem Ólafi fannst betra en Laufabrauðskaka með sméri, voru tvær Laufabrauðskökur með sméri. 

Framhald.
.

 

.

Tilgangurinn

... hann bylti sér í rúminu... hann gat ekki sofnað... hann vildi ekki sofna... hann var alveg við það að uppgötva stóra leyndarmálið... um hvað þetta allt snérist, af hverju fæddumst við, af hverju dóum við, af hverju var heimurinn til... hver var tilgangurinn með þessu öllu...

... það var svo ótrúlega stutt í það að hulunni væri svipt frá augum hans, fannst honum... svörin voru öll handan við hornið... en hvernig sem hann streðaði við að komast fyrir þetta horn, þá náði hann því ekki...

... hann fór fram úr, gekk eftir ganginum fram í stofu... náði í kerti í skúffu og kveikti á því... slökkti öll ljósin í húsinu... fann hvernig kertaljósið róað hann... smám saman tæmdist hugurinn... það hvarf allt... fólk... vinnan... dýr... bílar... raddir... orð... allt nema eitt orð... tilgangur... það sveiflaðist eins og pendúll í höfði hans... tilgangur - tilgangur... gangurinn til... gangurinn til... gangurinn til... himnaríkis?... var svarið að koma?
.

 

.

Hann gekk aftur til baka eftir ganginum í átt að svefnherbergisdyrunum... það slokknaði á kertinu... hann sá ekki neitt... en augu hans opnuðust í myrkrinu... jááááá... hvíslaði hann spenntur út í loftið... þetta er svona einfalt... hann sá hvernig í öllu þessu lá...

Hann lagðist á koddann... fann að nú myndi hann sofna strax... lokaði augunum... sá fyrir sér eitt orð í huganum sem sveiflaðist fram og aftur...

TILGANGUR - TILGANGUR

Hvað er ég?

... þú ert það sem þú borðar er sagt...

... ég borða;

...lambakjöt, naut og svín, kjúkling, gæs, sveppi, agúrkur, kartöflustöppu, tómata, epli, vínber, ís, appelsínur, súkkulaði, skyr, rúsínur, gráfíkjur, lúðu, pylsur, ýsu, silung, hrísgrjón, kornfleks, hákarl...

... ég borða eiginlega allt nema plast...

... ég hef komist að því að ég er krókódíll...

.

.

... en kannski borða krókódílar ekki gráfíkjur?

Ósanngjarnt

... voðaleg viðkvæmni er þetta í enska knattspyrnusambandinu... mér finnst nú að Sir Alex eigi að fá að njóta vafans og megi nú segja meira en aðrir stjórar í skjóli langs og farsæls ferils... enda finnst mér undantekningarlaust að gagnrýni hans á dómara sé sanngjörn og eigi við rök að styðjast...

...eins og í umræddum leik við Hull þar sem dómarinn dæmdi vægast sagt ódýra vítaspyrnu á United og hefði átt að reka varnarmann Hull út af fyrir fólskulegt brot á Michael Carrick...

... það eru engir sem hafa eins mikla reynslu og skilning á fótbolta eins og Sir Alex Ferguson...

.

 

.

Ferguson í bann og sektaður

Núll - lausn vandans

... hvað er ekkert?  Það er svo oft talað um ekkert...

... það kostar 0 kr. Nova í Nova... segir í auglýsingunni... eru 0 kr. ekkert?

... margir myndu samsinna því að 0 er ekkert... en 0 skiptir rosalega miklu máli... ekki síst í dag... hvar væru tvö þúsund milljónir dollara ef ekkert væri núllið?

Ég kann ekki alveg að fara með núllið fyrir aftan aðra tölustafi... veit að eitt 0 fyrir aftan 1 eru tíu, tvö 0 eru hundrað, þrjú 0 þúsund, fjögur 0 tíu þúsund, fimm 0 hundrað þúsund, sex 0 ein milljón,  sjö 0 tíu milljónir, átta 0 hundrað milljónir, níu 0 þúsund milljónir sem er jafnt og einn milljarður... ef ég er þá ekki þegar orðinn ruglaður í rýmunum... (n.b. ég er ekki bara með eitt rými eins og sumir)...
.

 

.

En ef að núllið væri ekkert... þá hefði engin efnahagskreppa skollið á okkur... það er nokkuð ljóst... við, þjóðin skulduðum þá ekki svo stórar tölur...

Það hefði enginn steypt sér í djúpar skuldir, hvorki Björgúlfur, né Ásgeir Jón... 

Allt kostaði miklu minna, nánast ekkert, húsnæðið maður lifandi... örfáar krónur... og bílarnir... Skuldir heimilanna væru hlægilegar...

Það var núllið... sem kom okkur í þetta klandur... og þar liggur lausnin líka falin.

Við feldum Z-tuna niður úr íslensku máli fyrir margt löngu síðan... er ekki kominn tími til að fella helv... núllið niður?
.

 

.

 

Þarf að sækja um

... nú þarf ég að fara að drífa í því að sækja um nafnið mitt, Brattur... það hýtur að fljúga í gegn...

... annars man ég eftir mönnum sem hétu Þiðrandi og Nývarð... ætli það sé búið að banna þau nöfn og einhver önnur?

Af hverju þurfa annars að vera reglur um þetta?

Af hverju má t.d. karlmaður ekki heita Sigfríður?... Held að í því góða landi Færeyjum sé karlmannsnafnið Sigfríður til. Hljómar bara vel á karlmanni ef þið hugsið út í það.

En það er ekki nóg fyrir mig að sækja um eitt nafn, ég þarf eftirnafn líka... og það er reyndar löngu komið þó ég hafi ekki notað það hingað til... Steinsnar... er nafnið... Brattur Steinsnar... eftirnafnið höfðar til þess að ég er aldrei langt í burtu frá sjálfum mér... bara svona steinsnar...
.  

.

Aðólf, Júní, Maríkó og Skugga samþykkt

Sannleikurinn í skápnum

... var að spá í hvort maður átti sig alltaf á því hvað sé rétt og hvað sé rangt... hvað sé satt og hvað sé logið... sannleikurinn getur oft verið einfaldur þó ekki sé allt sem sýnist.... sá sem segir satt getur litið lygilega út... skoðum þessa sögu...

Kona ein keypti sér nýjan fataskáp, ætlaði að koma manni sínum á óvart þegar hann kæmi heim úr vinnunni um kvöldið... með í kaupunum fylgdi uppsetning á skápnum... samsetningamaður kom á staðinn og setti skápinn saman inn í svefnherbergi þeirra hjóna og fer svo...  en svo gerist það nokkru seinna að strætó keyrir framhjá og skápurinn fellur í sundur... konan hringir með það sama í verslunina og segir hvað gerst hafði... samsetningamaðurinn kemur aftur og skilur ekkert í þessu...
.

 

.

... setur skápinn saman aftur og segir við konuna; ég ætla inn í skápinn og sjá hvað gerist þegar strætó keyrir næst framhjá... hann fer inn í skáp og lokar...

En þá gerist hið óvænta... húsbóndinn kemur heim og finnur konuna í svefnherberginu þar sem hún situr á rúminu og horfir á skápinn... hva... bara nýr skápur segir maðurinn og sviptir upp hurðinni á nýja fataskápnum...

... samsetningamaðurinn stendur hálf aumingjalegur og horfir á eiginmanninn sem nú var farinn að skipta litum... hvern andsk... ert þú að gera þarna... hreytir húsbóndinn út úr sér...

Samsetningamaðurinn stamar... ég, ég er bara að bíða eftir strætó.

.

 

.

Ég axla ábyrgð

... ég er að spá í að axla ábyrgð... núna ég næ bara í hana inn í geymslu, hún  er við hliðina á jóladótinu... svo þvæ ég hana og strauja og skelli henni bara á axlirnar... svo ætla ég að spássera um göturnar og sýna öllum hvernig ég axla ábyrgð...

... þetta þykir svo fínt í dag... ekki vil ég vera einn af þeim sem ekki vilja axla ábyrgð... ekki ég, nei takk...

Svona lítur ábyrgðin mín út... bara krúttleg, ekki satt?

.

.