Gussi

Gussi var járnsmiður.  Hann var eiginlega alltaf skítugur en var samt að nokkru leiti snyrtipinni.  Þegar hann kom heim seinnipartinn fór hann strax úr rauða járnsmiðssamfestingnum og beint í sturtu.  Hann náði þó aldrei skítnum almennilega undan nöglunum.  Einnig voru olíu og ryk agnir fastar í andliti hans í stóru svitaholunum.  Þess vegna leit ekki út fyrir að Gussi væri hreinn þegar hann steig út úr sturtunni. 

Hann sveipaði ljósbláu handklæði með mynd af bleikum pelikana um sig og gekk að speglinum.  Honum fannst allt í lagi að vera alveg sköllóttur.  Það passaði svo vel við hann, járnsmiðinn.  Hann dró inn of stóran magann, horfði á prófílinn og blikkaði sjálfan sig.  Já, hann var bara nokkuð sáttur. 

Síðan þurrkaði hann sér á milli tánna og bar á sig fótakrem.  Náði í naglaþjöl og reyndi að skafa undan nöglunum.  Bar loks húðmjólk á hausinn á sér og andlitið.  Síðan klæddi hann sig í svarta skinnbrók og hnýtti á sig sauðskinnsskó.  Greip með sér mórauðu lopapeysuna og skotthúfuna sem amma Hófa hafði gefið honum þegar hann varð fimmtugur. 

Í kvöld var æfing hjá  ÞJÁMA,;þjóðdansafélagi járnsmiða á miðjum aldri.
.

.

Athugasemdir

[Hrönn Sigurðardóttir, 10.9.2009 kl. 09:13]

Hvar eru æfingar haldnar?

[Brattur, 10.9.2009 kl. 10:02]

Í félagsheimili ÞJÁMA... þú bara gúgglar það Hrönn